عزمنا احد الاصدقاء على كوفي شوب في الرابيه لحضور مباراه لبرشلونه وريال مدريد .مع اني
كنت متعود احضر هاي المباريات عالقهوه ..لكن اصر صديقنا الا نطلع عالرابيه...ودخلنا الى المكان
وكان خليط من الذكور والاناث يملأ القاعه....واسترعى انتباهي محدوديه اللبس من الطرفين
وكان الشباب لابسين كت وعاملين شعرهم زي المسامير... نفسي اعرف مين الحلاق تبعهم
اكيد مش ابو العبد...وحاملين خلويات شكلها حلو...وبحكوا حكي اكتره انجليزي..
المهم بدت المباراه ..وبدأ التشجيع والهتاف...يااااااااااي .....حلوووووووو ..يا روحيييييي
اديلوووو.......ايوااااااااااااااه....وكل شوي وهم قايمين بايسين بعض....انا الحقيقه صرت بدي اقوم
اقعد عند البنات واشجع زيهم ..بلكي واحده اجت باستني
قلت بعقلي شو التشجيع المايص هدا؟...لا في طبله ولا شبر...ولا كتابه عالحيطان ولا مسبات
زمان كنت اشجع فريق الوحدات...وما كانت مباراه تروح علي..حتى لو مطر او ثلج...وعلى مدار
الوقت كنت دايما اقول ويييحدااااات...وييييحدااااااات...وكنت البس شبره خضرا حتى وانا نايم بالفرشه
وبنطلون اخضر وقميص اخضر...يعني من الاخر ..زي الرجل الاخضر...كنا نطلع من الصبح على ستاد
عمان مع انه موعد المباراه كان يكون المغرب...ويا عيني لما تكون المباراه مع الفبصلي...كنا نجيب
كل الطبلات اللي بالحاره ....ونطرش حالنا طراشه بالاخضر جكر بمشجعين الفيصلي...وطبعا كلمه
ويييييحدااااات ...ويييييييحدااااااات....على طول الخط
وفي يوم قطعت تذكره درجه ثانيه لاني تاخرت عن حضور المباراه لظروف قاهره...وطبعا كنت لابس
كل اشي اخضر مع الشبره اللي عالراس والكتابه عالوجه ...وكل انواع التشجيع...لكن بدون الشله
تبعتي ..وبدون الطبله...وقغدت وسط الجمهور....وطبعا جمهور الدرجه الثانيه بكون خليط بين
الوحدات والفيصلي...يعني مش 100% وجدات ....المهم انا كنت اشجع لعيب بالوحدات اسمه
يعقوب(مش الاسم الحقيقي)...كنت اموت على لعبه وعلى حركاته...لكن مشكلته كانت انه افكح
عند الجول ...يعني من كل خمسين شوطه عالجول بجيب واحده...المهم بدت المباراه وبديت انا
اقول وييييييحداااات...وييييييييحداااااات...ومسك يعقوب الطابه....ومشي فيها وصرت انا اقول يللا يا
حبيبي يا يعقوب... ايوه يعقوب...بسرعه يعقوب ...احلى يعقوب...وشاطها يعقوب بره الجول..صرت
اقول يلعن حرمك يا يعقوب ...الله يكسرها اجرك يا يعقوب....ولاحظت واحد بجحر فيي...قلت اكيد
هذا من مشجعين الفيصلي ومدسوس بيننا... ويييييحداااات ...ومسك يعقوب الطابه مره
ثانيه ...ومشي فيها ...احلى يعقوب...حبيبي يعقوب....ايوه شنكله للعيب الفيصلي...انفراد يا
يعقوب...ايوه يا يعقوب...وشاطها بره يعقوب...الله يفضح عرضك يا يعقوب....الله يشل املك يا
يعقوب....ولك خساره تكون بفريق المكرسحين انت....ولاحظت نفس الشخص بجحر فيي اكتر واله
خاطر يقوم يضربني ..لكن انا رجعت اقول ويييييييحدااااات....ويييييحداااااااات...وما اهتميت...وبرضه
مسك الطابه يعقوب...وعمل بليله لنص لعيبه الفيصلي ..ومشي...ايوه يعقوب...احلى يعقوب
بالعالم....ايوه اكسحه العن حرمه....يللا جول يا يعقوب ..حول يا يعقوب...وشاطها بره يعقوب...
يلعن ابوك يا يعقوب....يلعن امك يا يعقوب....يلعن حرم اللي حطك بالفريق كان مهو لطخ...وفجأه
قام هذا اللي كان يجحر فيي....وقاللي ولك انت صارلك ساعتين بتسبسب يللي ما تستحي ..ولك
انا ابوه ليعقوب....وعينك ما تشوف الا النور....كل بوكس يضربني اياه اصير اشوف كل الدنيا بتلمع
وصار هو يضرب وكل مشجعين الوحدات تضرب معاه... وانا اقول بعقلي
وييييييحدااااات ...ويييييحداااااات....وبالحفايه لما قدرت افلت منهم...وهربت وهم لاحقين فيي
ونطيت من الدرجه الثانيه للدرجه الاولى....والدرجه الاولى معروفين كلهم فيصلي...ويا
عيني...كاني نزلت عليهم من السما ...ما صدقوا وهم يشوفوني....وهات شلاليت وبوكسات
وانا اقول بعقلي وييييييحدااااات....وييييييييحدااااااااات.....وبرضه بالكندره لما قدرت افلت منهم لكن
انا صار لوني اخضر واحمر من كتر الضرب....وطلعت بره الاستاد وانا دايخ وبتدروخ ومش شايف الفضا
المهم شافوني الشرطه بره وانا دايخ....الضابط بقول للي معه هدا شكله سكران ..الناس بطلت
تستحي ...واجت الشرطه طبعا وكملت ضرب ...وانا اقول وييييييحدااااااات ...ويييييييييحدااااات
صحيت بالبيت على امي بتحطلي كمادات على وجهي وبتبكي. وبتقول الله لا يجبرهم اللي
عملوا فيك هيك.الله يكسر ايدهم يا رب.....كان كل اشي فيي بوجعني حتى شعري ...وكانت هاي
اخر مباراه بحضرها بحياتي من الاستاد....و حاليا بشجع فريق البراعم في روضه الطفل الجميل لانه
اكيد ما راح انضرب اذا شجعت حد
صحيت على صوت صراخ بالكوفي شوب جووووووووووون ...ولقيت بنت بتنط علي وبتبوس فيي
دفعتها بعيد وقلتها..يعقوب بقربلك اشي؟
سلامات
الخميس أبريل 10 2008, 18:07
